Палітычныя і гандлёва-эканамічныя адносіны

Дыпламатычныя адносіны паміж Рэспублікай Беларусь і Малайзіяй усталяваны 5 сакавіка 1992 г.

Пасол Рэспублікі Беларусь у Рэспубліцы Інданезія і ў Малайзіі (па сумяшчальніцтве) з верасня 2017 г. — Калеснік В.Г. (3 сакавіка 2012 г. па ліпень 2017 г. — У.М. Лапато-Загорскі).

У чэрвені 1999 г. адбыўся працоўны візіт у Малайзію дэлегацыі Рэспублікі Беларусь на чале з намеснікам Прэм'ер-міністра — Міністрам замежных спраў Рэспублікі Беларусь Латыпавым У.Р.

У лютым 2003 г. беларуская дэлегацыя на чале з Міністрам замежных спраў Рэспублікі Беларусь Хвастовым М.М. прыняла ўдзел у працы XIII Саміта Руху недалучэння ў г.Куала-Лумпуры.

У мае 2006 г. у рамках міністэрскай сустрэчы Руху недалучэння (г.Путраджая, Малайзія) адбылася сустрэча Міністра замежных спраў Рэспублікі Беларусь Мартынава С.М. з Міністрам замежных спраў Малайзіі Сайед Хамідам Албарам.

У ліпені 2007 г. адбыўся візіт у Малайзію Міністра замежных спраў Рэспублікі Беларусь Мартынава С.М.

У чэрвені 2009 г. праведзена сустрэча міністраў замежных спраў Беларусі і Малайзіі падчас саміта Руху недалучэння ў г.Шарм-Эль-Шэйх (Егіпет).

У чэрвені 2010 г. Малайзію наведаў намеснік Міністра замежных спраў Рэспублікі Беларусь Алейнік С.Ф. і прадстаўнікі беларускіх дзелавых колаў.

У мае 2012 г. у г.Шарм-эль-Шэйх у рамках міністэрскай сустрэчы каардынацыйнага бюро Руху недалучэння адбылася сустрэча намесніка Міністра замежных спраў Алейніка С.Ф. з намеснікам Міністра замежных спраў Малайзіі А.Каіланам.

У чэрвені 2012 г. у г.Маскве адбылася сустрэча Міністра прамысловасці Рэспублікі Беларусь Кацярыніча Д.С. з Міністрам міжнароднага гандлю і прамысловасці Малайзіі М. Бін Махамедам.

У сакавіку 2015 г. дэлегацыя Міністэрства па падатках і зборах Рэспублікі Беларусь на чале з намеснікам Міністра Элай Сяліцкай наведала Малайзію для правядзення кансультацый па праекце Пагаднення аб пазбяганні двайнога падаткаабкладання і папярэджанні ўхілення ад выплаты падаткаў у дачыненнi да падаткаў на даходы і маёмасць.

У кастрычніку 2016 г. Малайзію наведаў намеснік Міністра замежных спраў Рэспублікі Беларусь Рыбакоў В.Б. Адбыліся сустрэчы ў міністэрствах замежных спраў, сельскай гаспадаркі і аграрнай прамысловасці, міжнароднага гандлю і прамысловасці, абароны, вышэйшай адукацыі, а таксама ў Парламенце Малайзіі, Нацыянальнай гандлёва-прамысловай палаце і з кіраўніцтвам буйных кампаній.

Развіваецца міжпарламенцкае супрацоўніцтва.

У рамках 120-й Асамблеі МПС (5 — 10 красавiка 2009 г., г.Адзіс-Абеба, Эфіопія) прайшла сустрэча Старшыні Палаты прадстаўнікоў Нацыянальнага сходу Рэспублікі Беларусь Андрэйчанкі У.П. з Намеснікам Старшыні Палаты прадстаўнікоў Парламента Малайзіі Ван Юнайдзі бін Туанку Джафарам.

Ажыццяўляюцца рэгулярныя кантакты парламенцкіх дэлегацый Беларусі і Малайзіі ў рамках Міжпарламенцкай Асамблеі АСЕАН (2012 год — у Інданезіі, 2013 год — у Брунеі, 2014 год — у Лаосе, 2015 год — у Малайзіі, 2017 год — у Філіпінах, 2018 год – у Сінгапуры).

У жніўні 2014 г. адбыўся візіт у Рэспубліку Беларусь малазійскай парламенцкай дэлегацыі на чале з намеснікам Спікера Палаты прадстаўнікоў Парламента Малайзіі Рональдам Кіандзі.

У снежні 2016 г. адбыўся афіцыйны візіт у Рэспубліку Беларусь Спікера Палаты прадстаўнікоў Парламента Малайзіі Пандзікара Аміна Муліі. Праведзены сустрэчы з Прэзідэнтам, Прэм'ер-міністрам Рэспублікі Беларусь, старшынямі Палаты прадстаўнікоў і Савета Рэспублікі Нацыянальнага сходу, Старшынёй Мінскага аблвыканкама, адбылося наведванне шэрагу прадпрыемстваў.

У Нацыянальным сходзе Рэспублікі Беларусь 7-га склікання створана рабочая група па супрацоўніцтве з парламентам Малайзіі. Аналагічная група сфарміравана ў 2020 г. ў парламенце Малайзіі.

Паміж Рэспублікай Беларусь і Малайзіяй падпісаны:

- у мае 2013 г. — Мемарандум аб узаемаразуменні паміж Нацыянальнай акадэміяй навук Беларусі і Акадэміяй навук Малайзіі аб навуковым і тэхнічным супрацоўніцтве.

- у снежні 2016 г. — Мемарандум аб міжпарламенцкім супрацоўніцтве паміж Палатай прадстаўнікоў Нацыянальнага сходу Рэспублікі Беларусь і Палатай прадстаўнікоў Парламента Малайзіі.

- у лістападзе 2016 г. — Пагадненне аб супрацоўніцтве паміж Беларускім дзяржаўным універсітэтам і Універсітэтам Малайя.

 Дынаміка гандлю Рэспублікі Беларусь з Малайзіяй

(млн. долараў ЗША)

Ажыццяўляюцца пастаўкі прадукцыі беларускага нафтахімічнага комплексу, вымяральных прыбораў, а таксама малочнай прадукцыі.Аснову беларускага экспарту ў Малайзію складаюць пастаўкі калійных і мінеральных угнаенняў, вырабаў з каменя, прадукты неарганічнай хіміі.

Маюцца перспектывы для нарошчвання паставак у гэтую краіну беларускага хлорыстага калія і сельскагаспадарчай тэхнікі.

Асноўныя артыкулы імпарту: адзенне і вырабы з гумы, электронныя інтэгральныя схемы, апаратура для сувязі, медыцынскія прыборы і прылады.

У мае 2013 г. у г.Куала-Лумпуры праведзена Нацыянальная экспазіцыя Рэспублікі Беларусь у рамках 24-й Міжнароднай выставы вынаходак, інавацый і тэхналогій «ITEX 2013».

У мае 2015 г. Беларусь наведала дэлегацыя буйнога малазійскага аграхолдынга «Felda Global Ventures Holding». Адбылася сустрэча дэлегацыі з Прэм'ер-міністрам Рэспублікі Беларусь Кабяковым А.У. Абмеркавана пытанне нарошчвання паставак калійных угнаенняў у Малайзію.

У кастрычніку 2015 г. у Дзелавым і культурным комплексе Пасольства Беларусі ў г.Маскве прайшоў беларуска-малазійскі бізнэс-форум.

Павелічэнне паставак беларускіх малочных прадуктаў і калійных угнаенняў у Малайзію спрыяе росту беларускага экспарту ў дадзеную краіну. У выніку ў 2020 годзе беларускі экспарт у Малайзію павялічыўся на 42,3% (у параўнанні з 2019 годам), дасягнуўшы 118,2 мільёна дол. ЗША.

Працягвае развівацца двухбаковае беларуска-малазійскае палітычнае супрацоўніцтва. 26 кастрычніка 2021 г. адбыліся кансультацыі ў фармаце анлайн Пасла Беларусі ў Джакарце Валерыя Калесніка з Дырэктарам па справах Еўропы МЗС Малайзіі Халідам Аббасі.

5 сакавіка 2022 г. Міністры замежных спраў дзвюх краін Уладзімір Макей і Сайфудзін Абдула абмяняліся віншавальнымі пасланнямі з нагоды 30-годдзя ўстанаўлення дыпламатычных адносін.

У 2021 годзе беларускія экспарцёры працягнулі асвойваць малазійскі рынак. Па выніках года рост паставак малочнай сыроваткі склаў 116,8% (у параўнанні з 2020 годам), мэблі — 278,4%. Па новай пазіцыі «ёгурт і кефір» адгружана прадукцыі на 0,7 мільёна дол. ЗША., «вуглярод» — на 0,4 мільёна дол. ЗША. Беларускіх паслуг у 2021 годзе аказана на 49,5 мільёна дол. ЗША (у параўнанні з 2020 годам).